बाड़ बंणाग मनस्वाग,कबर्योेेेेंकु भ्यूंचाळ
कैकि नजर लगि होलि मेरा कुमौं गढवाळ
हव बदळीं-बदळीं सळ-सळु ह्वै पाणी
गैल अपड़ा विराणा तौभि खळ-खळु पराणी
पंचनाम बौगा हुयां बौगु खेतरपाल
कैकि नजर लगि होलि मेरा कुमौं गढवाळ
सैंतीं पाळीं डाळी उंद बगणी छिन
जुगु कि गैल्या डांडी उंद रड़णी छिन
गाड धार एैंच बगणी,धार ह्वैग्या खाळ
कैकि नजर लगि होलि मेरा कुमौं गढवाळ
देवतौं कि थाति म मनखि डर्यां-डर्यां सि किलै
बासंति फूल जरायां-जरायां सि किलै
चोरि सुख-चैन कैन आवा मांगा ज्यूंद्याळ
कैकि नजर लगि होलि मेरा कुमौं गढवाळ
किल्ला यखुला रोणा धन चैन हरचिग्या
धिल्डी ठोपरि ज्यूड़ि घास कु तरसिग्या
ग्वाया,किलकारियों सुणनौ कु तरसि डिंडयाळ
कैकि नजर लगि होलि मेरा कुमौं गढवाळ
